« 義工都有獎 | Main | 軒尼詩道和盧押道交界巨型外牆招牌 »

關於網誌主人:謝連忠律師

我係謝連忠,做咗13年律師,自1985年港大社科畢業,開始在法律是非圈打滚,依家40幾歲,人唔老,但心態已老,因為發現呢個世界唔係咁過癮,多謝老豆老母生我出來,見到人間大花筒。2004年聖誕印度洋大海嘯搞到生靈塗炭,唔通聖經預言嚟真,上帝要消滅人類,耶穌從天而降返回人世?各位請執生。

《舊夢不須記》是我印象中最喜歡的歌,所以這個 blog 叫 Past Dreams。夢如人生、人生如夢,過去的生活片段随時間如夢般逝去,留下零碎不全的記憶,日誌讓人可以憶述更多。

我對法律界無乜建樹,只不過在灣仔軒尼詩道九龍城沙埔道搞了兩個樓高十層的大外牆招牌,東周老總話呢個係全世界最大嘅律師廣告招牌。有時諗吓,招牌有無大過頭?我參選過律師會嘅周年理事選舉,一共兩次,兩次都輸,其實贏輸都無緊要,我係唔會做理事嘅。

啲中學同學以為我想從政搞政治,呢誤會好深,可能因為我係大學時修政治,又當學生會幹事,搞校園政治。但我發誓絕無此意,我認為從政係自由嘅敵人。

我係幾份報紙寫過專欄:太陽報、星島、新報,還有一張欠過我稿費已經執咗笠既報紙,自由投稿就有SCMP、信報、經濟日報、明報、都市日報、成報,其他唔記得有無,多數有稿費。寫過一本叫《香港電子法律》WWW.ELAW.COM.HK嘅中文法律書,係蝕本嘅。搞咗唔少個法律網站,一句講晒,鍾意寫嘢。唔少人話我出名,但我唔係好覺,但可以肯定,唔少人係報紙、雜誌、電視見過我個貓樣,我老豆就好鍾意同啲鄉里、朋友咁講。

2000年我開始幫人申請破產,之後又做埋債務重組(IVA),出晒名,結果逢係破產、欠債都好似同我間律師樓有關,啲人以為阿B鍾鎮濤單破產都係我搞,實情非也。我鍾意得閒就整吓網站,因此網站數目我唔太清楚,同債有關嘅係:www.iva.com.hk; www.broke.com.hk,www.thebroke.com好駕勢,連路透社、世界報和祖國報紙都報導過,唔知算唔算國際新聞?

我係個凡人,希望安安份份過埋下半世,我畢生人最痛恨嘅事,係曾經比朋友、舊同學出賣,因此患有朋友焦慮症,我發夢見邊華陀,佢話佢再世都醫唔好我,我只好發誓帶眼識人。


葉謝鄧律師行合伙人、IVA主管
★香港執業律師(1991)
★香港大學社會科學榮譽學士(1985)
★英國倫敦大學法律榮譽學士(1988)
★香港大學法律專業進修文憑
★明愛向晴軒《衝出債網》顧問律師
《香港電子法律》作者
★公開大學李嘉誠學院提供律師會認可的法律持續進修課程講師,題目包括電訊法規、電子交易和個人資料私隱
★太陽報《監察網》專欄作家
瀏覽謝連忠律師提供所有:
法律新聞法律內容多媒體法律內容

 

2005.01.25 in 關於網誌主人 | Permalink